సాహిత్యంలో ప్రకృతి – (3)

ఆర్యుల తొలి నివాసం గురించి పూర్వం జరిగిన చర్చలో, ఆర్యులు తొలుత ఉత్తర ధ్రువమండల వాసులని ఒక వాదం ఉండేది.  భూమండలం యొక్క ఉత్తర ధ్రువానికి సరిగా ఉత్తరాన ఒక నక్షత్రం (దీనినే ధ్రువ నక్షత్రం అంటారు) ఎప్పుడూ కదలకుండా ఒకే చోటన ఉన్నట్లు కనబడుతుంది. ఉత్త ధ్రువం వద్దకు వెళ్ళి నిలబడి చూచేవారికి ఆ నక్షత్రం సరిగా నడినెత్తి మీద ఉన్నట్లుగానూ, మిగతా నక్షత్రాలన్నీ ధ్రువనక్షత్రం చూట్టూతా ఒక గొడుగులాగానూ, కుమ్మరి సారె లాగానూ, గిరగిర తిరుగుతూ ఉన్నట్లుగానూ కనబడతాయి.  ఉత్తర ధ్రువ మండలం దగ్గర భూగోళంలో ఉత్తరార్ధ భాగం మాత్రమే కనబడుతూ, మిగతా ధక్షిణార్ధ భాగం ఎప్పుడూ కనబడకుండా ఉంటుంది. అక్కడ సూర్యుడు ఉదయించిన ఆరు మాసాలకు గాని అస్తమించడు.  అస్తమించిన తరువాత మరి ఆరు మాసాలకుగాని తిరిగి ఉదయించడు. అందువలన అక్కడ  ఆరుమాసాలు పగలుగానూ, మిగతా ఆరు మాసాలు రాత్రిగానూ ఉంటాయి. ఆరు మాసాల ఆ మహా రాత్రి ముగింపుకు వచ్చే దశలో, సూర్యుడు దక్షిణార్ధ గోళం నుండి, ఉత్తరార్ధ గోళానికి ఉదయిస్తూ ప్రత్యక్షం అవుతాడు. ఈ లక్షణాలతో ఉన్న ఉత్తరధ్రువాన్ని పూర్వులు మేరు పర్వతం అని పిలిచారు, వర్ణించారు.

సూర్యుడు ఉదయించడానికి ముందు కనుపించే వెలుగును ఉషస్సు అని పిలుస్తారు.  ఈ ఉషస్సు ఉత్తర ధ్రువం ధగ్గర నివసించే వారికి ఆరు నెలలపాటు సాగే దీర్ఘమైన రాత్రి అంతరించే సమయాన భూమ్యాకాశాలు కలిసిపోయినట్లుండే దిక్చక్రం(horizon) దగ్గర కనుపించి, దాని అంచుల దగ్గర 60 గడియల కొకసారి గిర్రున తిరుగుతూ ఉంటుంది. క్రమక్రమంగా వెలుతురు ఎక్కువ అవుతూ 30 రోజుల కాలంపాటు ఈ ‘ఉషస్సులు’ తిరిగిన అనంతరమే సూర్య బింబం ప్రత్యక్షమౌతుంది.

ఉత్తర ధ్రువం దగ్గర ఒక పగలు, ఒక రాత్రి, మరి ఈ రెంటి మధ్య సంధ్య కాలాన్ని పరిశోధకులూ, పెద్దలూ ఇలా వివరించారు:

“జనవరి 29వ తేదీన మొట్టమొదటి వెలుగు కనిపిసుంది. ఇదే ఉషః కాంతి. ఇది 47 రోజులు ఉంటుంది. ఆ తరువాత మార్చి 16వ తేదీన సూర్య బింబం ఉదయిస్తుంది. సెప్టెంబరు 25వ తేదీన అస్తమిస్తుంది. కానీ ఆ తరువాత 48 రోజుల వరకూ సంధ్య వెలుగులు ఉంటాయి. తరువాత నవంబరు 13వ తేదీ మొదలుగా 76 రోజులు సూర్య సంబంధమైన వెలుతురేమీ ఉండదు. అయితే ఆ రోజులలో కూడా ఉత్తర ధ్రువానికి సరిగ్గా నెత్తి మీద బంగారపు రంగు కాంతి విరజిమ్మే ఒక బలమైన జ్యొతి వలన వెలుతురు సంభవిస్తూ ఉంటుంది. ఇలాంటి బంగారు రంగు కాంతులతో కమ్ముకుని ఉండడం చేతనే మేరువు బంగారుకొండ అని ప్రసిధ్ధి చెందింది.”

ఆర్య దేవతల నివాసం మేరు పర్వతం. ఆర్య దేవతల దినములో సగం, ఆరు నెలల పగలు, మిగతా సగం ఆరు నెలల రాత్రి. అంటే మనకు ఏది ఒక సంవత్సరమో అది ఆర్య దేవతలకు ఒక దినం. ఉత్తర ధ్రువం దగ్గర ఉండే ఈ ప్రకృతి పరిస్థితులు ఆర్య దేవతల దివారాత్రములతో సరిపోతూండడం, ఆర్యుల తొలి నివాసం ఉత్తర ధ్రువ ప్రాంతమై ఉండవచ్చన్న ఊహకు, అభిప్రాయానికి దారి తీసింది.

పైన ఉదాహరించిన వామదేవుని ఋక్కులో ఉషస్సును ‘ఉషస్సులు’గా బహువచనంలో చెప్పడానికి కారణమూ ఇందులో లభిస్తుంది. అదేకాదు, ఋగ్వేదంలో ఉషస్సు ఎక్కడ వర్ణించ బడినా ‘ఉషస్సులు’ అని బహువచనంలో వర్ణించబడడానికి కారణమూ ఇందులో లభిస్తుంది.  

అయితే, ఋగ్వేదం ఆర్యులు ఉత్తరధ్రువ మండల వాసులుగా ఉన్నప్పుడు చెప్పిన గ్రంథమా? అదే అయితే, వారు ఆ ప్రాంతాన్ని వదిలి సిందులోయకు (ఏ కారణాల చేతనైనా సరే) తరలి వచ్చిన తరువాత కూడా, సింధులోయలో ఉత్తరధ్రువ ప్రాంతానికి సరిపోయే ప్రకృతి పరిస్థితులు లేనప్పుడు కూడా, పూర్వ భావ సంచయాన్నే ఎందుకు కొనసాగించినట్లు? సింధులోయలో కనుల ఎదుట ‘ఉషస్సులు’గా కనుపించని ఉషస్సుని ‘ఉషస్సులు’గానే ఎందుకు కొనసాగించినట్లు? ఇక్కడ ఊహించుకోవడానికైనా అలవిగాని ఆ భావసంచయాన్ని ఏమార్పూ లేకుండా అలాగే కొనసాగించడం ద్వారా వారు చెప్పదలచుకున్న దేమిటి? చెప్పిందేమిటి? ఇక్కడి ప్రకృతి పరిస్థితులకు అనుగుణంగా కొత్త భావసంచయాన్ని రూపొందించుకోవడానికి వారెందుకు శ్రధ్ధ చూపలేదు? ఇత్యాది ప్రశ్నలకు
సమాధానాలు దొరకడం అంత తేలిక కాదు.

ప్రకటనలు

స్పందించండి

Fill in your details below or click an icon to log in:

వర్డ్‌ప్రెస్.కామ్ లోగో

You are commenting using your WordPress.com account. నిష్క్రమించు / మార్చు )

ట్విటర్ చిత్రం

You are commenting using your Twitter account. నిష్క్రమించు / మార్చు )

ఫేస్‌బుక్ చిత్రం

You are commenting using your Facebook account. నిష్క్రమించు / మార్చు )

గూగుల్+ చిత్రం

You are commenting using your Google+ account. నిష్క్రమించు / మార్చు )

Connecting to %s